Милли парк

Әйләнә-тирә мохитне саклау максатларында кеше эшчәнлеге чикләнгән территория милли парк дип атала. Тыюлыктан аермалы буларак, милли паркларга туристларны кертәләр.

1991 елның 20 апрелендә Татарстанда «Түбән Кама» милли паркы төзелә. Ул республиканың төньяк-көнчыгышында, Чулман елгасы һәм аның кушылдыклары үзәнлегендә урнашкан. Парк территориясендә яшәүче имезүчеләрнең, кошларның, җир-су хайваннарының кайбер төрләре республиканың Кызыл китабына кертелгән.

«Түбән Кама» буенча урман массивлары буйлап берничә коры җир һәм су туристик маршрутлары һәм шулай ук сусаклагыч акваториясе, Чулман һәм Криуша елгалары буйлап су маршрутлары салынган.