Вәли Хаҗиев

Вәли Хаҗиев - безнең горурлык!

Вәли Хаҗиев 1925 елның 9 июлендә Татарстанның Саба районы Оет авылында крестьян гаиләсендә туа. Колхозда бригадир булып эшли.

1943 елның гыйнварыннан – Кызыл Армиядә. Саратов өлкәсенең Татищево станциясендә пулемёт училищесында хәрби ант кабул итә. Әмма училищены тәмамлап бетерми, чөнки курсантларның бер өлешен Татарстан АССРда оешкан 334 нче укчылар дивизиясе штабы урнашкан Псков өлкәсенең Великие Луки шәһәре районына җибәрәләр.

Сугышчан юлы

1944 елның июненнән - сугышта. Белоруссияне азат итүдә катнаша. Комсомолның 1126 нчы укчы полкы укчысы кызылармияче Вәли Хаҗиев 1944 елның 25 июнендә, беренчеләрдән булып, Витебск өлкәсенең Шумилин районы Гринёво авылы янында Көнбатыш Двина елгасын кичә. Ярда дошман урнашкан була, Хаҗиев, куаклар артында яшеренеп, дошман дзоты амбразурасына якынлаша һәм граната белән аны юк итә. Шулай ук дошманның тагын бер пулемёт ноктасы бетерелә. Дошман һөҗүме какшый, бу исә полкка күчү һәм плацдармны алу мөмкинлеген бирә. Бу сугышта плацдармда Хаҗиев яралана, әмма сугыш кырларыннан хәрби бурычны тулысынча үтәмичә китми.

Сугыштан соң демобилизацияләнә. Татарстан Республикасының Яшел Үзән шәһәрендә яши. 1995 елның 16 маенда вафат була.

Бүләкләре

ССРБ Югары Советы Президиумының 1944 елның 22 июлендәге Указы белән, немец-дошман илбасарларына каршы көрәш фронтында командованиенең хәрби биремнәрен үрнәк үтәгәне һәм күрсәткән батырлыгы өчен, Вәли Хаҗиевка Ленин ордены һәм «Алтын Йолдыз» медале тапшырылып, Советлар Союзы Герое исеме бирелә.

Хәтер

1999 елда Яшел Үзән шәһәренең бер урамына Советлар Союзы Герое Вәли Хаҗиев исеме бирелә.