ТАТАРСТАН АГРОХИМИЯ ҺӘМ ТУФРАК БЕЛЕМЕ ФӘННИ ТИКШЕРЕНҮ ИНСТИТУТЫ

Институтка 1970 елда СССР Авыл хуҗалыгы министрлыгы боерыгы буенча нигез салына. Ул Үзәк авыл хуҗалыгына агрохимия хезмәте күрсәтү институтының филиалы (бүлеге) булып оеша һәм Идел-Нократ төбәге һәм Урта Идел буеның дүрт өлкәсе һәм биш автономияле республикасы территорияләрен колачлый.

1982 елда институт Бөтенроссия авыл хуҗалыгын химияләштерү фәнни тикшеренү һәм проект-технология институтының Казан филиалы итеп үзгәртелә. 1985 елда Идел-Нократ филиалына әйләнә. 1997 елда «Плодородие» фәнни тикшеренү станциясе итеп оештырыла. 2000 елда учреждение үзенең хәзерге исемен ала. Бүген институт Россия Фәннәр академиясенең Казан фәнни үзәгенә карый.

Институтның эшчәнлек юнәлешләре:

- Туфрактан сак файдалану өчен ашламалар әзерләү;

- Туфракның уңдырышлылыгына, аның экологик торышына бәя бирү;

- Ашламалар куллану;

- Агроминералларны (авыл хуҗалыгы өчен файдалы минераллар) куллану ысулларын камилләштерү;

- Лабораторияләрдә агроминералларның йогынтысын өйрәнү;

- Экологик чиста продуктлар алуның яңа ысулларын эшләү;

- Химикатлар кулланганнан соң туфракның торышы турында фараз төзү;

- Теоретик тикшеренүләр алып бару һәм яңа файдалы формулалар уйлап табу; - Авыл хуҗалыгы өчен нанотехнологияләр (вак кисәкчәләрдән торган составлар) уйлап табу һәм өйрәнү;

- Нефть продуктлары белән пычранган туфракны чистарту һәм кабаттан файдалану;

- Туфракта тереклек итүче микроорганизмнарны өйрәнү һәм алардан ашламалар ясау;

- Туфракның уңдырышлылыгын торгызу;

- Кисәкчекләре микроскопик зурлыкта булган минераллар эшләү, өйрәнү һәм бәяләү;

- Мондый минералларның тере организмнарга йогынтысын өйрәнү.

Институт гаять зур һәм мөһим эш башкара. Мәсәлән, 2014 елдан 2019 елга кадәр 29 яңа алым, ысул һәм технология, шулай ук 3 методика эшләнә; 18 фәнни хезмәт чыгарыла, 445 мәкалә бастырыла, 30дан артык уйлап табу документлар белән раслана.

«Алтын көз» Бөтенроссия күргәзмәсендә институт яңалыклары 25 алтын, 18 көмеш һәм 8 бронза медаль алган. Хезмәткәрләр фән һәм техника өлкәсендә Татарстан Дәүләт премиясенә лаек булганнар.