КАЗАН ХИМИЯ ФӘННИ ТИКШЕРЕНҮ ИНСТИТУТЫ (КазхимНИИ)

Фәнни тикшеренү институты (ФТИ) 1964 елда тәнне массакүләм зарарлану коралыннан һәм зыянлы матдәләрдән саклау чараларын җитештерү өлкәсендә тикшеренүләр уздыру, эшләнмәләр ясау максатында оештырыла. 1968 елдан институт үтә агулы һәм агулы химик матдәләрдән саклануның индивидуаль чараларын эшләү һәм бәяләү буенча Россия Хәрби-сәнәгать комплексының төп фәнни үзәгенә әверелә. 2005 елдан ул ачык акционерлык җәмгыяте (күп хуҗалы оешма) итеп үзгәртелә.

Институт фәнни тикшеренүләр һәм кешенең тән тиресен саклау чараларын җитештерү белән шөгыльләнә. Оешма шундый саклану чараларын эшләүчеләр һәм тәэминатчылар ассоциациясенә керә. Институтта заманча җиһазлар, тәҗрибәле хезмәткәрләр һәм сынаулар үткәрү өчен фәнни лабораторияләр бар.

Институтта сынау производствсы һәм тугыз фәнни тикшеренү лабораториясе эшли. Алар төрле куркыныч матдәләрдән, җылылыктан, нурланыштан һәм уттан саклану комплектлары уйлап табалар һәм җитештерәләр. Алар шулай ук вибрациядән саклану чаралары да эшлиләр. Институт Россиядәге һәм чит илләрдәге төрле компанияләр һәм оешмалар белән хезмәттәшлек итә.

ФТИ тикшеренүләре энергия саклый торган яңа «Энерго-Profit» составлары уйлап табарга ярдәм иткән. Алар гадәти җылылык изоляциясе материалларыннан яхшырак. Белгечләр куркыныч эшләрдә тирене саклау һәм аварияләр вакытында куллану өчен комплекслы саклану чаралары уйлап тапканнар. Институтта шулай ук химик коралны юкка чыгаруда кулланыла торган әйберләр эшләнгән.

Институт казанышлары өчен хөкүмәт бүләкләренә, дәүләт премияләренә һәм медальләргә лаек булган. Ул шулай ук үзенең заманча эшләнмәләрен күргәзмәләрдә күрсәтә һәм 40 тан артык авторлык таныклыгына ия.