Галләм Морзаханов

Галләм Морзаханов — Днепр флотилиясенең батыр матросы

Галләм Гыймади улы Морзаханов 1925 елның 27 мартында Татарстан АССР Яшел Үзән районы Татар Наратлысы авылында крестьян гаиләсендә туа. 4 сыйныф белем алганнан соң колхозда тракторчы булып эшли. 1943 елда Кызыл Армиягә алына һәм Днепр хәрби флотилиясенә эләгә.

Бөек Ватан сугышы фронтларында каты сугышларда катнаша. 1944 елның июлендә Белоруссиянең Пинск шәһәре янында Припять елгасында 5 десант операциясендә катнашып, дошманның стратегик әһәмиятле күперен һәм 300 машиналык автопаркын яулап ала. Бу сугышларда дошманның 5 ут ноктасын юк итә, күп кенә фашист солдатын әсирлеккә ала. Сугышта башы авыр яралана. Сугыштан соң туган авылына кайта, "Комсомолец" колхозы ревизия комиссиясе рәисе булып эшли. 1947-1955 елларда ТАССР Югары Советы депутаты була.

1990 елның 25 маенда Казанда вафат була.

Бүләкләре

1945 елның 7 мартында Советлар Союзы Герое исеме бирелә. “Алтын Йолдыз” медале һәм Ленин ордены тапшырыла, I дәрәҗә Ватан сугышы ордены белән бүләкләнә.

Хәтер

Яшел Үзән шәһәренең Җиңү паркында Геройлар аллеясендә аның барельефы урнаштырылган.

Галләм Морзаханов — безнең горурлык, аның батырлыгы безгә Ватанны яклауның изге бурыч булуын искә төшерә.